ސިނަމާލެ ބްރިޖު ކައިރީ ރޭ ހިނގި އެކްސިޑެންޓުގައި އަނިޔާ ލިބުނު 16 އަހަރުގެ ކުއްޖާއަށް ފަރުވާ ދެމުންދަނިކޮށް ނިޔާވެއްޖެއެވެ.
މާލެ ބޮޑުތަކުރުފާނު މަގު، ބްރިޖު ލައިޓް ކައިރިން ބާރުސްޕީޑުގައި ދުއްވި ސައިކަލެއް ކޮންޓްރޯލް ނުވެ ގޮސް ޕޭވްމަންޓު މައްޗަށް އަރާ ވަނީ ނުކުރައްކާތެރި އެކްސިޑެންޓެއް ހިނގާފައެވެ.
މި އެކްސިޑެންޓު ހިނގައިގެން ފުލުހުންނަށް ރިޕޯޓް ކޮށްފައިވަނީ ރޭ ދަންވަރު 1:39 އެހާއިރު ކަމަށް ފުލުހުން ބުންޏެވެ.
ފުލުހުން ބުނީ މި އެކްސިޑެންޓު ހިނގި އިރު ސައިކަލު ދުއްވަން އިން 19 އަހަރުގެ ފިރިހެން މީހާ އާއި ފަހަތުގައި އިން 16 އަހަރުގެ ފިރިހެން ކުއްޖާއަށް އަނިޔާވެެގެން ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށާއި، ފަހަތުގައި އިން ކުއްޖާއަށް ފަރުވާ ދެމުންދަނިކޮށް ވަނީ ނިޔާވެފައި ކަމަށެވެ. އަދި އެކްސިޑެންޓުވި ސައިކަލު ދުއްވާފައިވަނީ އެ ކެޓަގަރީ ގެއުޅަނދު ދުއްވުމުގެ ލައިސަންސް ނޯންނަ މީހެއް ކަމަށްވެސް ފުލުހުން ބުނެފައިވެ އެވެ.
ފުލުހުން ބުނީ މި މައްސަލަ ގެންދަނީ ތަހުގީގު ކުރަމުން ކަމަށެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކާއި ފޮޓޯތަކުން ފެންނަ ގޮތުގައި މި އެކްސިޑެންޓު ހިނގާފައިވާ ސަރަހައްދުގައި ވަރަށް ގިނަ ލޭ ހުރިތަން ފެނެއެވެ.
